Starodawny serbski sedleński rum jo pšawniski wuraz, kenž geografiski resp. administratiwny wobceŕk wopisujo, w kótaremž wěste póstajenja mjeńšynowego šćita płaśe.
Ze Serbskeju kaznju z lěta 1994 su starodawny serbski sedleński rum na zakłaźe wuznaśa ako geografiski a administratiwny wobceŕk wopisowali, w kótaremž wěste póstajenja mjeńšynowego šćita płaśe. Sedleński rum Serbow su z kazniskeju nowelu w lěśe 2014 skóńcnje definěrowali. Ten wopśimjejo komuny, w kótarychž jo minimum na pś. zjawnostneje dwójorěcnosći a serbskich kubłańskich pórucenjow póznaś. Take komuny su rum, źož jo nimsko-serbska dwójorěcnosć žywa a se regionalna identita rozšyrja.
To su bźezwokrejsne město Cottbus/Chóśebuz a gmejny we wokrejsach Dubja-Błota, Górne Błota-Łužyca a Sprjewja-Nysa, w kótarychž se daju rěcne abo kulturne tradicije až doněnta dopokazaś.
Źěle wokrejsa Dubja-Błota su w starodawnem serbskem sedleńskem rumje. K tomu słušaju gmejny Slopišća, město Lubin (Błota) z měsćańskimi źělami Kamjena, Rańchow, Radom, Hartmanojce, Lubolce, Nowa Wjas, gmejna Markojska Góla z wejsnymi źělami Dołgi, Lutol, Małe Linje, Mrocna a slědujuce jsy w amśe Luboraz/Górne Błota: Běła Góra-Bělin, Nowa Niwa, Stara Niwa, Błośańska Góla z wejsnymi źělami Bucyn, Łaz, Zakrow a Waldow a gmejna Tšupc (Błota).
Za luźi, kenž su tam žywe a jich serbske tradicije a rěc woplěwaju, ma wokrejs wósebnu zagronitosć, aby se toś ten kulturny pokład za pśiduce generacije wobchował.
