Južo do 1945 stej wokrejsa Lubin a Łukow z jadnakima wokrejsnyma městoma wobstojałej.
Parsk jo słušał tencas k wokrejsoju Teltow.
Pó załoženju NDR su w lěśe 1952 teritorij kraja Bramborska do wobwodow rozrědowali.
Wokrejsa Lubin a Łukow stej słušałej k wobwodoju Chóśebuz.
Wokrejs Parsk jo słušał k wobwodoju Pódstupim.
Wob casa pśewrota 1989/1990 su pśez Kazń wó samozastojnstwa gmejnow a wokrejsow w NDR (komunalna wustawa dnja 17.05.1990) wobwodne struktury změnili. W nowem zwězkowem kraju Bramborska su wokrejse Lubin, Łukow a Parsk dalej wobstali.
Z wokrejsneju teritorialneju reformu kóńc lěta 1993 su tegdejše wokrejse ze zapśimjeśim gmejnowu Telz (stary wokrejs Sosny) a Wernarjejce (stary wokrejs Pśibor) kaž teke město Luboraz a gmejny Brjazka, Dobrobuz, Chošćišća, Jamnice, Łazk, Błotko, Spěcharjow, Trjebac a Kuša (wšykne stary wokrejs Bezkow) k wokrejsoju Dubja-Błota zgromaźili.
Město Damna z gmejnami Polany, Gněwaśice, Kamjenica, Małošojce, Wjaska, Pśemysłojce, Rietdorf, Rosenthal a Wildau-Wentdorf (wšykne stary wokrejs Łukow) su k wokrejsoju Teltow-Fleming pśišli.
